PN-BESI-TL-hala’o Input Tracking ba Sistema Bee Moos iha Munisípiu Ermera
Plataforma Nasionál Bee, Saneamentu no Ijiene Timor-Leste (PN-BESI-TL) hamutuk, parseiru HAK, Grupu Feto Foinsa'e Timor Lorosa'e-GFFTL, Pontu fokal FONGTIL Munisípiu Ermera no Autoridade Lokal suku Lauala no WaterAid Timor-Leste iha loron 04/07/2024 hala’o Teste Kualidade Bee no Input Tracking ba bee matan Maukrous no Borleta. Objetivu husi atividade refere mak, atu hare tuir fila fali kondisaun no situasaun fornesimentu sistema refere ba komunidade sira, inklui observa mós ninia operasaun & manutensaun ba sistema refere.
Iha atividade Input Tracking PN-BESI-TL hamutuk ho entidade relevante sira inklui komunidade benefisiariu diretamente ba too iha bee matan hodi halo observasaun ba sistema bee refere ho objetivu haree direita kondisaun bee matan no fasilidade sira ne'ebé iha hanesan tanke kaptasaun, iha tempu hanesan ekipa halo kedas teste kualidade bee ne'ebé fornese ba komunidade benefisiariu sira konsumu. Remata husi vizita bee matan ekipa kontinua rekolla informasaun sira relasiona ho sistema bee refere bazeia ba indikadór sira sistema bee Rural nian ne'ebé utiliza iha prosesu Kartaun Pontuasaun Komunidade (KPK) hodi input ba sistema aplikasaun mWater no observa direta fasilidade Torneira Públiku ne'ebé instala ona.
